عندى مشكله مش عارف
طيرت النوم
من عيونى
البت الى بتجرى
وتطلع جوه كشكولى
ساعات بتغيظنى
وتنرفزنى
وتتسبب فى جنونى
وساعات تنام ساعات
وايام وانده واقول
يلا قومى
وهى مش فى دماغها
وانا اقطع فى هدومى
............
ساعات بكون تعبان
نفسى ارتاح شويه
عايز انام
القاها طالعه من جوايا
تهزنى تصحينى
ترمى لى الكلام
يا ستى مش عايز
حبطل حب
تطلع لسانها وتقول
يا سلام!!!!!!
..........
وفى مره لقيتها
جايه عامله صوت الحمام
شويه هديل
على حبه عويل
مالك يا ستى؟قالتلى
ودينى دار الايتام
هناك حلاقى ناس طيبين
من الحنان معجونين
بيعطفوا على المساكين
مش زيك محتار
مش عارف تختار
وحتفضل كده علطول
مش قادر تاخد قرار
عين فى الجنه
وعين فى النار
..............
قلتلها ازاى يا بنتى
وانت حبيبتى
وعمرى ما زعلتك
وكاتب عنك
فى قصيدتى
..........
قالت لى انا عايزه اقدم لك جميل
حاروح هناك واقابل الجميل
وحاقول له انك بتحبه
حب انا ملقتلوش مثيل
........
قلت لها والله انك اصيله
حفظتى الجميل ومكنتيش بخيله
بتدورى على سعادتى يا مسكينه
انا رايح معاكى لحبيبتى الجميله
...........
ليست هناك تعليقات:
إرسال تعليق